აჭარის პოპულარიზაცია საერთაშორისო ტურისტულ გამოფენებზე მიმდინარეობს

აჭარის ტურისტულ შესაძლებლობებს მუმბაის საერთაშორისო ტურისტულ გამოფენაზე “OTM 2025” გაეცნენ. აზიის უმსხვილესი გამოფენის ფარგლებში აჭარის ტურიზმის დეპარტამენტის ხელმძღვანელმა თინათინ ზოიძემ შეხვედრები გამართა მარკეტინგული, ტურისტული კომპანიების, ასოციაციებისა და მედიის წარმომადგენლებთან, ინფლუენსერებთან. მათ შორის The times of India-ს, Incredible India-ს, India Outbound-ის, Outlook traveller-ის, Travel Turtle-ის⁠, Thomas cook-ის, ⁠BOTT-ისა და Tripoto-ს მენეჯმენტთან. მუმბაის საერთაშორისო ტურისტული გამოფენა აზიაში ერთ-ერთი უმსხვილესი გამოფენაა, რომელშიც წელს 60 ქვეყნის 1600-ზე მეტი კომპანია და ორგანიზაცია მონაწილეობდა. გამოფენაზე აჭარის ტურიზმის დეპარტამენტი ტურიზმის ეროვნულ ადმინისტრაციასთან და 45 ტურისტულ კომპანიასთან ერთად იყო წარმოდგენილი.

აჭარის ტურიზმის დეპარტამენტმა რეგიონისა და ზოგადად, ქვეყნის პოპულარიზაცია ინდოეთის ტურისტულ ბაზარზე გასულ წელს დაიწყო. 2024 წელს, აჭარას ინდოეთიდან მაღალრეიტინგული მედია გამოცემების, ტურისტული კომპანიების წარმომადგენლები და ინფლუენსერები სტუმრობდნენ. მათ შორის იყვნენ Conde Nast Traveler-ის, Outlook Traveler-ის, Thomas cook-ის, Travel  Turtle-ისა და India Outbound-ის წარმომადგენლები.  

წელს, აჭარის ტურიზმის დეპარტამენტმა რეგიონი ასევე წარმოაჩინა საერთაშორისო ტურისტულ გამოფენებზე ფინეთში, ესპანეთში, ლიეტუვაში, ესტონეთსა და ამერიკის შეერთებულ შტატებში. წლის ბოლომდე, აჭარის პოპულარიზაცია ჯამში 25 -მდე საერთაშორისო ტურისტულ გამოფენაზე იგეგმება.